والله العظيم .. هيغرقونا يا ريس

والله العظيم .. هيغرقونا يا ريس

 

 

بقلم – خالدعبدالحميد

 

لن نمل من الكتابة  طالما في العمر بقية .. سلاحنا الوحيد هو القلم .. سنظل نكتب حتي يصل صوتنا اليك يا ريس .. يا من فوضناك لحماية مصر والمصريين .. نعم الحمل ثقيل .. والتركة ثقيلة .. ولكن عدد كبير ممن يعملون معك والمقربون منك .. لا يصلحون ..  هم فشلة أو خونة .. تسببوا باهمالهم او خيانتهم في توريطكم والتأثير علي شعبيتكم وحب المواطنين لكم .

يا ريس قلنالك اكثر من مرة وفي أكثر من مناسبة .. كتبناها .. ونشرناها .. قلنالك يا ريس .. المحليات سبب كارثة مصر .. رؤساء الأحياء لابد من استبعادهم فورا .. والمحافظين اختيارات زي الزفت .. مين سمع صوتنا .. ولا حد .. رؤساء حكومات مش عارف بيحكموا مين ومسئولين عن مين ودورهم ايه بالضبط لما كل مصيبة تحصل في مصر مش بيحلها الا الجيش والقوات المسلحة .. حتي المجاري اللي سلكها القوات المسلحة .. امال الجهاز التنفيذي فين يا ريس .. فين الوزراء .. فين المحافظين .. فين الجيوش الجرارة من التنفيذيين ورجال المحليات .. راحوا فين .. وبيعملوا ايه ؟ .. الفلوس السحت اللي بيقبضوها كل شهر .. كله حرام في حرام .. واحنا اللي بندفع الثمن 

.. بالذمة ده رئيس حكومة .. يا ريس وزير التنمية المحلية فين .. وبيعمل ايه ؟ هل حاسب المحافظين .. هل اقال رئيس حي ؟

يا ريس سيادتك اللي هتشيل الشيلة واحنا معاك .. قلناها من زمان .. من ساعة ما سيادتك  جيت رئيس جمهورية وتحملت المسئولية .. طهر الجهازالتنفيذي من الخونة وعناصر الجماعة الارهابية .. حد سمعنا ؟ ! .. حد خد برأينا ؟ !  .. وايه النتيجة .. سدوا بلاعات المجاري والصرف في اسكندرية والبحيرة علشان يغرقوا البلد .. وغرقت البلد .. خبوا اكثر من 12 عربة كسح مجاري في مخازن سرية ومنعوها من الخروج لشفط المياة والجيش اكتشف الخونة وأفرج عن العربيات.. والنتيجة مصرع اكثر من 22 مواطن مصري برئ .

الناس بتموت يا ريس .. الناس بتغرق يا ريس .. مش في المية .. لأ .. بتغرق في اهمال المسئولين والمحليات .

 .. للأسف .. الاختيار غيرموفق من أول رئيس الحكومة وانت نازل .

انا اسف يا ريس من حدة الخطاب وارتفاع النبرة واللهجة ..  أنا شايف شغلك ومجهودك  بيضيع بفعل خونة مجرمين في المحليات ولا رادع لهم ولا رقيب .. نعلم أنك لا تنام مثلنا .. ولا تهنأ بحياتك الخاصة مثلنا .. وهذا ما يجعلنا نصرخ بأعلي صوت .. عايزين يفشلوك يا ريس .. عايزين يقلبوا الشعب عليك

 .. عايزين يزهقوا الناس يا ريس .. وللأسف  بعض رجالتك ساعدوهم ودعموهم .

ارجوك .. استحلفك بالله .. وبالقرآن الكريم اللي حافظه في صدرك وقلبك .. طهر الجهاز التنفيذي .. المحليات عايزة ابادة .. والله العظيم عايزة ابادة .. المحليات هي الجهة الوحيدة اللي بتشتغل مع الناس 

يا ريس .. مصر أمانة بين ايديك .. واللي ماتوا في اسكندرية والبحيرة بسبب الاهمال والخيانة ولادك .. ولازم تاخد لهم حقهم فأنت الراع وأنت المسئول عن الرعية.. أعانك الله علينا .. وربنا معاك .. واحنا وراك .

اترك رد

%d مدونون معجبون بهذه: