بوابة الوطن المصرى أجرأ موقع عربى
كتبت – ألاء شوقى
كل الدول اللي سبقتنا .. الفيروس انتشاره انفجر في الأسبوع الثالث .. و خرج عن السيطرة في الأسبوع الرابع ..وعشان كده الأسبوع الثالث بتاعنا هو الإختبار الحقيقي .. واللي هيحصل سيناريو واحد من اثنين :
السيناريو الأول : الناس هتستمر في الإستهانة بالموضوع .. و هيستمروا في إقناع نفسهم إن الموضوع بعيد و عند الناس التانيين و هيستمروا في الإهمال و التعامل مع الموضوع على إنه حرب أعصاب ..و إنهم أنصح من كل اللي حواليهم .
السيناريو ده هيكون معناه إن اللي هيتصاب هيعدي كل بيته و جيرانه .. و حتى اللي واخد احتياطاته هتبقى معركته أصعب و حمايته أصعب .
ده نفس السيناريو اللي حصل في إيطاليا .. الناس خدت أجازات .. نزلت المولات و عملوا تجمعات ..
وحاليا بيتم إختيار الناس اللي هتاخد مكان على أجهزة التنفس الصناعي بالقرعة والباقي هو و حظه.
السيناريو الثاني : إن الناس تفهم خطورة الموقف .. و اللي عارف يقول للي مش عارف .. و اللي فاهم يقول للبسيط .. و اللي عنده سلطة ينفذها و يجبر الناس اللي يقدر عليهم إنهم يلتزموا .
السناريو ده .. هو سيناريو الوعي .. ده نفس السيناريو اللي بيطبق في الصين .. الدولة المصدر … نفس السيناريو اللي خلى مقاطعة ووهان اللي كانت هي المنبع .. إنها تحتفل من يومين إنها خالية من الفيروس …
الموضوع حسبته بسيطة .. الفايروس مدة احتضانه ١٤ يوم .. لو سيطرنا على نفسنا كمجتمع ٣ اسابيع .. الأزمة تخلص .. لأن لو كله التزم .. المصاب مش هيلاقي حد يعديه .. و بإذن الله يخف .. و اللي بيحافظ على نفسه تبقى مهمته أسهل عشان كل اللي حواليه فاهم و بيتعاون .
دورك دلوقتي إنك تختار السيناريو المناسب ليك .. لو ليك أي سلطة أو صوتك مسموع .. وصل صوتك و عرف اللي حواليك إن المعركة عايزة كل شخص .. لو أنت يوتيوبر أو ليك متابعين على السوشيال ميديا .. كلم اللي عندك و عرفهم إن مافيش حاجة اسمها ناس اه و ناس لا في المعركة دي .
لو عندك حد لسه مقتنع إن الموضوع مؤامرة أو أنه بعيد عننا .. فهمه إن الكلام ده مش حقيقي .. و إن موقفه السلبي ممكن يتسبب في عدوى لولاده أو بيته أو زمايله في الشغل .
احنا دلوقتي في نفس الاختبار اللي اتحطت فيه كل الدول اللي قبلنا … و مع إنه هو نفس الفيروس … لكن كل دولة حصل فيها حدوتة مختلفة على حسب رد فعل شعبها ..
و هل فهموا بعض و وقفوا مع بعض و قاوموا الجهل و قاوموا الإهمال؟ .. ولا فضلوا فاكرين إن كل االي حواليهم بيبالغوا؟!
.. الحكومة عندنا بتعمل اللي تقدر عليه .. لكن مش هيقدروا يتابعونا في بيوتنا .. لازم كل واحد يبقى مسؤول عن اللي حواليه..
وخليكم فاكرين …
في دولة احتفلت بانتهاء الفيروس من مجموعة من مقاطعاتها (محافظاتها)
وفي دولة قالت لشعبها .. ودعوا من تحبون .. فالنهاية قادمة.
