بوابة الوطن المصرى أجرأ موقع عربى
بقلم : محمود عشيش
من اول لحظة تدخل فيها سفارة مصر بالكويت وتحضر لقاء السفير محمد أبو الوفا تحس إنك قدام راجل بيفهم يعني إيه مسؤول يمثل بلده وبيسمع للناس مش علشان يرد… لكن علشان يناقش ويساعد في الحل
اللقاء كان بسيط في شكله لكنه كبير جدا في مضمونه ومعناه
السفير جمع بعض ابناء الجالية المصرية بالكويت علشان يسمع مقترحاتهم ومشكلاتهم بنفسه وده في حد ذاته تصرف محترم بيأكد إن السفارة بيت كل مصري في الغربة.
الجميل في السفير أبو الوفا إنه مش جديد على الكويت ده خدم فيها كنائب للسفير سنة 2016، وعنده خلفية قوية عن الجالية واحتياجاتها.
وده ظهر في أسلوبه الهادئ وابتسامته وصبره في سماع كل الطلبات مهما كانت بسيطة او معقدة
والأجمل في اللقاء انة كان شبه خلية نحل منظمة
كل مسؤول في مكانه جاهز يسمع ويرد
السفير شريف بدير قنصل مصر بالكويت كان بيرد على كل استفسار قنصلي وعن زيارات المستشفيات وعن زيارات مراكز الأبعاد وعن مجهودات لجنة بطاقة الرقم القومي وعن دور لجنة المساعدات وغيرها الكثير من اسهامات القطاع القنصلي وتطورة ورقمنة المعاملات
والمستشار العمالي وضح كل ما يخص المكتب العمالي
والمستشار التجاري اتكلم عن فرص الاستثمار والتجارة بين مصر والكويت وفتح فرص استثمارية حقيقية للأبناء الجالية في مصر علي جميع مستوياتهم المالية لكن بشرط الجدية في الاستثمار
والمستشارة الثقافية كانت بتجاوب على كل استفسار عن المكتب الثقافي والمدرسة المصرية بالكويت.
السفير أعلن كمان عن وثيقة التأمين الجديدة للمصريين بالكويت واللي تعتبر واحدة من أهم الخطوات اللي بتخدم المصريين بالخارج
الوثيقة بتغطي حالات الوفاة بتعويض ٤ آلاف دينار كويتي بجانب تعويضات للحوادث والإصابات وحتى في حالات انتهاء الخدمة أو مخالفة الشركة لشروط التعاقد
وده دليل إن الدولة المصرية دايما بتفكر في أولادها في كل مكان.
كمان السفير وعد الجالية إنه هيوصل كل طلباتهم لوزارة الخارجية
خصوصا اللي تخص مبادرات زي السيارات والتجنيد وبيت الوطن وبينك في مصر ووعد بمتابعة شخصية منه لكل التفاصيل
لكن اللي يستحقوا التحية فعلا هم رجال الظل .. الناس اللي اشتغلت في صمت علشان اللقاء يطلع بالشكل المحترم ده
