بوابة الوطن المصرى أجرأ موقع عربى
بقلم اللواء / بهاء البجاوي
ليسمح لى الجميع أن أكتب هذا المقال باللغة العامية البسيطة حتى يصل للبسطاء..
مش عاوزين نبقى زى الدبة إللى قتلت صاحبها.. البلد بلدنا والضرر حا يضرنا كلنا وإللى فاكرها شطاره وعمال يطلع إشاعات ( وعلى فكره دول ناس مننا فينا بعيد تماماً عن الإخوان ) وعمال يدلق بنزين على النار.. عاوز أقوله مش نقصاك يا عم الحاج والبلد فيها إللى مكفيها.. ولازم نعترف ونشيد بالجهود إللى بتقوم بها الدولة وخاصة مجهودات وزارة الصحة فى مقاومة فيروس كورونا، وبالمناسبة لازم نعترف إن وزيرة الصحة زى ما كنا بنهاجمها فى حاجات قبل كده لاء المرة دى فعلا بتبذل مجهود جبار ولازم نرفع لها القبعه بجد ومش تريقة.. ولازم نبقى عارفين وفاهمين إن إمكانيات الدولة عندنا مش زى لا الصين ولا أوروبا ولا أمريكا ونقول الحمد لله إن الدولة لغاية دلوقتى صامدة وقادرة تقف فى مواجهة شرسة لمقاومة فيروس ومرض وصل لكل بلاد العالم وكمان ظهر فجأة ولازم نعرف إن تكاليف الإجراءات للحماية الصحية منه مش بسيطة وكل ما الفيروس بينتشر التكاليف بتتضاعف وطبعا مكنش فى الحُسبان.. يبقى نحمد ربنا إنه ساترها معانا لغاية دلوقتى.. وبالنسبة للأخ والأخت إللى بيطلعوا إشاعات عاوز أقولهم نظفوا نفسكم واهتموا بنظافة ولادكم والفيروس مايجيش ناحيتكم فى أبسط من كده ولا عاوزين الحكومة ووزيرة الصحة يوزعوا عليكم صابون ويعلموكم كيفية غسل اليدين وبالمره يلفوا على القهاوى يفهموا الرجالة والشباب إللى كل واحد منهم زى الشحط إنه مش وقت شرب شيشه، ولا كمان يفهموهم إنه مش شطاره إنك تُخرم الماسك الطبى وتدخل منه الشيشة زى الطفل إللى بيرضع..
وقبل ما تتريق على المسؤول وتطالب بتأجيل الدراسة ووقف السياحة وتعطيل المترو.. و.. و.. إلخ.. لازم تفهم إن القرارات دى مش سهل زى ما إنت متخيل، أنا معاك طبعا إن صحة المواطن أهم حاجه وكلنا بنطالب بكده، بس لازم تعرف إن أى قرار من النوعية دى بيترتب عليه حاجات تانيه كتير مش على بال حضرتك بس المسؤول لازم يحطها فى الإعتبار لأنه ممكن ياخد قرار يرضى حضرتك يلاقى فى قطاع كبير من الشعب تضرر من هذا القرار، يعنى لو وقفنا السياحة والعاملين فى السياحة تضرروا وهؤلاء بالملايين وعملوا أزمة فى البلد لأن حالهم وقف وفين وفين لما تبقى السياحة ترجع تانى.. حضرتك إللى حا تتحمل ده ولا المسؤول، وعلى فكره هو هو نفس المسؤول إللى عمل إللى يرضيك…
ولو حضرتك مكان المسؤول حا تضرب لخمه وتغرق وتغرقنا معاك فى شبر ميه…
قبل ما تتريقوا على المسؤول وتتريقوا على بلدكم إبدأوا بنفسكم الأول مش حا أقولك أقف جنب الدولة لاء يا سيدى كتر خيرك أقف جنب نفسك و أغسل ايدك بالماء والصابون كويس بس ومش مطلوب منك اكتر من كده
