شيخ عرب بدرجة قنصل

بقلم /  محمود عشيش

لما نتكلم عن القنصل المصري في الكويت السفير الانسان محمد رفيق اللي خلصت مدة خدمته لازم نرفع القبعة احتراما وتقديرا للراجل ده ليه؟ علشان كان مختلف. كان متواضع جدا وطني جدا وقريب من الناس بطريقة تخليك تحس انه مش بس مسئول قاعد ورا مكتب لكن أخ كبير جابر للخواطر وشيخ عرب بين الجالية المصرية
القنصل محمد رفيق حب مصر بجد وحب ولادها أكتر كان شايف إن مهمته مش مجرد أوراق وختم على جوازات لكن رسالة فيها احتواء ومحبة كان بيشوف كل مصري محتاج كانة والدة او أخوه او ابنه وبيفتح مكتبه لكل واحد من غير ما يفرق بين حد وحد مكتبه كان دايما منور بأبناء الجالية واللي عنده مشكلة كان يخرج مطمن إنه لقى أخ واقف جنبه مش مجرد مسئول بيخلص ورق او مسئول تقليدي
ومن اجمل صفاته إنه مكانش بيحب الظهور في الأضواء بالعكس كان دايما في الظل بيشتغل بجد واخلاص من غير ما يدور على كاميرا أو منصات وده اللي خلاه قريب أكتر من قلوب الناس لأنهم شافوا فيه تواضع حقيقي مش مجرد شعارات.
ومن أهم الحاجات اللي لازم تتكتب في تاريخه موقفه في انتخابات الرئاسة المصرية اللي فاتت القنصل محمد رفيق وقتها كان نموذج في الحياد والالتزام دعم أبناء الجالية بكل قوة شجعهم على المشاركة الإيجابية وقدم كل التسهيلات والدعم اللوجستي ساعد في إزالة أي عوائق قدامهم لكن من غير ما يوجه حد لمرشح أو يفرض رأي وده اللي بيأكد إنه كان بيشتغل بروح القانون والواجب الوطني
كمان كان دايما بيحاول يقرب بين المصريين في الكويت كل ما يحصل خلاف أو زعل كان يطلع يتكلم معاهم كأنه واحد من العيلة يقولهم خليكم إيد واحدة حبوا بعض سيبوا الخلافات على جنب وده خلى وجوده وسط الجالية مصدر أمان وطمأنينة
القنصل محمد رفيق كان بيحتوي الناس يسمع لمشكلاتهم ويجبر خواطرهم بكلمة أو فعل وده يمكن أهم من أي منصب أو لقب لأنه في النهاية اللي بيفضل في قلوب الناس مش الأختام ولا الأوراق لكن الإنسانية اللي بيزرعها فيهم
النهاردة وإحنا بنودع مدة خدمته في الكويت بنقول له شكرا يا سيادة القنصل محمد رفيق شكرا لانك كنت أخ قبل ما تكون مسئول شكرا لإنك عرفت إزاي تجمع الجالية المصرية في بلد غريب وتخليهم يحسوا إنهم دايما قريبين من وطنهم وجودك كان فرق كبير وذكراك هتفضل موجودة في قلوب كل مصري مر على باب مكتبك
وبنهاية المقال ما نقدرش غير إننا نتمنى للقنصل محمد رفيق التوفيق في أي منصب أو مهمة جاية لأنه ببساطة نموذج يشرف مصر في أي مكان يكون فيه وداعا يا قائد الظل ستظل في قلوبنا ودائما ستكون ذكري جميلة بين أبناء الجالية المصرية بالكويت