نكشف علاقة وزيرة الهجرة مع ربنا وركوعها المفاجئ فى غرفة مغلقة

الوطن المصرى – ألاء شوقى

كشفت السفيرة نبيلة مكرم، وزيرة الدولة للهجرة وشؤون المصريين فى الخارج، عن علاقتها بالله، خلال لقائها ببرنامج “كلام ربنا”، الذى يقدمه الإعلامى أحمد الخطيب، على الراديو 9090.

تطرقت الوزيرة للحديث عن موقف حدث معها خلال العام الماضى، حينما كانت مدعوة للمشاركة فى ملتقى الأديان بشرم الشيخ، الذى تحرص على حضوره لأنه يمثل لها فرصة للمشاركة والتجمع والصلاة فى دير سانت كاترين.

وقالت مكرم: “رحت الدير، زيارة دير سانت كاترين بتكون جميلة جدا وروحانية جدا، ولكن المرة دى كانت مختلفة لأن الناس كانوا عاوزين يرحبوا بيا ودخلونى الأوضة اللى ربنا كلم فيها موسى، الأوضة دى مش بتتفتح لحد، ولكن فتحولى الأوضة ودخلت وكان المكان ليه رهبة، كانت أوضة بتبص على شجرة موسى ومفروشة بسجاد أحمر نبيتى، ومن هيبة الموقف محستش بنفسى غير وأنا راكعة على الأرض وبصلى وبستعيد قصة موسى وهو بيكلم ربنا وطلبت كل حاجة ممكن أتخيلها، كنت المسيحية الوحيدة فى المجموعة اللى كانت معايا فى الزيارة، والباقى مسلمين، أنا ركعت أكلم ربنا والباقى أقام صلاة المسلمين، وكان شعور إن كلنا بنصلى فى المكان ده كان ليه رهبة وسعادة”.

وأضافت مكرم: “قلت لربنا إنى مستحقش أكون فى المكان ده ودخولى الأوضة دى مكانش مترتب، وشكرته على كل حاجة، على النعم والصحة، وأسرتى وشغلى، وعلى الحاجات اللى تدخل فيها دون علمى وأنقذنى من مواقف وسيل من الطلبات لأولادى إنه يحافظ عليهم ويوفقهم، ولجوزى ومامتى وحماتى ولكل جيرانى وأصدقائى، وكان ليا طلب لابنى رامى اللى بيدرس فى أمريكا وكان بيعمل الماجستير وكان قلقان من الامتحانات، ومن كتر قلقه مكنتش بعرف أوصله وطلبت من ربنا أنه يطمنى عليه إنه ماشى كويس، بعد الزيارة دى لقيت تليفون منه بيطمنى إنه حصل على الماجستير”.

ووصفت مكرم شعورها داخل الغرفة، وقالت: “حسيت إنى صفر، ولا حاجة، بتحس بصغرك وضعفك، وتحس إنك غير مستحق تقف فى المكان وتدخل فيه، برده حسيت أن دخولى الغرفة دى هدية من ربنا وحد بيجبر بخاطرى وآخد بركة المكان”، مضيفة: “سبت المؤتمر الصحفى والمجموعة اللى كانت فى الأوضة دى خرجت من الأوضة على المطار وما اهتمناش نحضر المؤتمر الصحفى، اتحطينا فى هالة من البركة والهيبة، وكنا عاوزين نرجع ببركة المكان ده”.