بوابة الوطن المصرى أجرأ موقع عربى
أخدت قرار انى لازم أتربى والتربيه مش عيب دا أنا اللى هربى نفسى لأنى شايف نفسى مش متربى .. جاى بعد ما كبرت تقول كده ؟ ايوه والنهارده قبل بكره .. لازم أعرف انى عشت حياتى فاتنى كتير من التربيه .. طيب أعمل ايه ؟
أربى نفسى من تانى أتعلم يعنى إيه أدب وذوق واتيكيت ويعنى ايه احترام الصغير للكبير ورحمه الكبير للصغير و اتعلم يعنى إيه ضمير ونخاف مقام ربنا اللى نسيناه للاسف ويعنى ايه علاقتى بربنا مش مظهر بدقن وجلبيه ازاى تبقى جوهر بيظهر مع كل معامله مع الناس .
لازم أتربى علشان انا ما عرفتش يعنى ايه رحمه ومحبه بين الخلق دا انا كمان طَفِشْت الناس من دينى وكَرَهتهم فيه وكرهونى الناس وكرهو دينى من افعالى بتخلفى وجهلى وعنصريتى وعدوانيتى وقله أدبى لحد ما بقيت فى نظر العالم داعشى ينتظر الفرصه لينفذ الجريمه .. كاره نفسه قبل كرهه للاخرين .
لازم أتربى والتربيه مش للاطفال بس دا التربيه كمان للكبير علشان اتعلم على أخلاقى وقيم كتير نسيناها .
إكتشفت ان الشعوب اللى حوالينا بتكرهنى وكل يوم نقول هم اللى وحشين وانا اللى عاجب نفسى كده وهما كارهينى علشان انا احسن منهم واللى مش عاجبه فى داهيه .
ماعادش الطلب عليا زى زمان كانوا بيطلبوا موظفين وعمال من مصر ودلوقتى مش عايزينى .. هم عايزين حد متربى .
ايوه الدول بتكرهنى لانهم شايفنى فوضوى مش بتاع شغل ومش متعلم عايز أظهر بمظهر الفهلوى المسيطر واللى بيبلطج على اللى معاه شايفينى وفاهمين الاعيبى وعارفين انى صوت بس بدون فعل والعشم بتاعى زايد مع الناس حاقد على اللى حواليا ومش عايز يشتغل وعايز يعيش بس على المعونات ازاى حد كده هيحترمنى .. ولو أنا مكانه تفتكر نفسى هتحترمنى ؟
انا شايف نفسى بقيت سىء وحسيت بالحقيقه لما سألت نفسى ايه اللى بعمله فى حياتى له قيمه دا انا على القهوه كل يوم بشيش وبلعب طاوله لحد الفجر وبيتسرق عمرى وبتريق كمان ومش عاجبنى .
انا شايف نفسى عاله على نفسى وعلى أهلى وعلى الناس وعاله على العالم اللى بتصرف عليا ومش عاجبنى وياريت ببص للى فى ايدى بس دا انا كمان ببص للى فى ايد غيرى وعايز منهم معونه ومش عاجبنى .. بجد عيب عليا .
لازم أتربى علشان اعرف يعنى إيه أمانه ويعنى إيه احترم نفسى واحترم غيرى علشان الناس تحترمنى.
لازم اتربى علشان اغير صورتى كفايه تخلف وجهل ورجعيه وتطرف وعنصريه مقيته مش بين الناس وبعضها لااااا حتى بين الاخوات والاهل .
لازم أتربى وانا اللى هربى نفسى وأأدبها واعلمها وهخليها محترمه تشتغل وتنتج ما تكونش عاله على العالم من النهارده ويكون ليا ولأولادى من بعدى قيمه مدركه وسط الأمم .
هتربى وانا كبير و كفايه العمر اللى راح منى وأنا مش متربى .
