فوكس يكتب لـ ” الوطن المصري ” عن الدواء المر في الفيسبوك وتويتر

مهما حاول البعض التقليل من أهمية أو قيمة مواقع التواصل الإجتماعي ” الفيسبوك وتويتر ” الا أن الحقيقة تؤكد بما لا يدع مجالا للشك أن تأثيرهما كبير علي شتي مناحي الحياة في مصر ، وأن المسئولين في بلادنا يعملون ألف حساب لهذه المواقع التي حركت المياه الراكدة في مصر طوال السنوات الماضية .

نخرج من ذلك بدرس هو ضرورة أن يرتفع كل رواد وكتاب مواقع التواصل لمستوي المسئولية الملقاة علي عاتقهم وأن يعلموا أن ما يكتبوه يتأثر به البعض سلبا وإيجابا .. والوطن في أشد الحاجة لكل كلمة ايجابية تشد من أزره في تلك المحنة التي يمر بها .. لابد ان تكون الكلمة مسئولة وهدفها مصلحة الوطن وفقط .

نعود لنتحدث بلغة الفيسبوكيون ونقول لهم ” ياريت كل واحد يخلى باله من كلامه او طريقة توجيهه للآخرين .. ياريت نفهم بجد ان بلدنا محتاجة جهود مش محتاجة رغى وكلام فارغ .. ياريت كل واحد يحطها حلقة فى ودانه .. الحلول القاسية والصارمة للخروج من اى ازمة قد تكون لها تأثير عنيف فى لحظتها ولكنها بتكون زى الدواء .. بيكون طعمه مر فى أول مرة ولكن بعد فترة بيكون سبب فى الشفاء .. علاج ازمتنا بأدينا مش عاوزين نلجأ لأحد .. مش عاوزين حد يكون له فضل علينا أو غشراف.

بأيدينا نشيل بلدنا على كتافنا بس نستحمل بجد .. وياريت قبل ما حد يقولى الناس بقت مش قادرة تعيش أو مش لاقية تاكل او الكلام المرسل ده .. ح أقوله .. ياريت كل واحد بس يخليه فى نفسه ويقول كلمة حلوة أو يسكت أحسن .

صدقونى كلنا بنخاف على بلدنا وكلنا نفسنا نكون أعظم دولة فى العالم . ومش ح يكون الحلول دايما بتغيير أشخاص أكتر من الحل المجتمعى والمواجهة مع انفسنا .. مع اسرافنا .. مع اطماعنا .. مع حالة الكسل اللى موجودة جوانا .. ياريت نبطل التواكل والاعتماد على الغير .. ياريت نبطل كلمة هى الحكومة عملت لنا أيه ؟ قبل ما نسأل نفسنا طب أحنا فاهمين ومدركين حجم الخطر وياترى احنا عملنا أيه ؟.. ياريت اللى قادر يشتغل يعمل ومن سكات ومالوش دعوة بغيره بيعمل والا لا .. اما الأخوة الهرايين والمنتفعين والمدفوعين نحو التخريب وانا شخصيا بأطلق عليهم ” الراقصون على الحبل ” .. فا ياريت ينقطونا بسكاتهم

الأعلام .. أصبح من أخطر أسلحة العصر الحديث وتأثيره تحول لأقوى من القنبلة النووية …

الإعلام .. والكلمة والخبر أصبح خارج الإطار القومى .. من حق كل اعلامى أن يتحدث للمواطن ولكن مش كل حاجة يمكن أن تعلن ومش أى حاجة نتكلم فيها بدون وجود المختصين .. والأخطر ان المختصين أصبحوا عبارة عن كعب داير على القنوات بيرددوا نفس الموضوعات اللى بتثير الريبة والقلق دون ان يشرحوا .. فا أيه لزومهم ؟؟؟؟ والا هى سبوبة وخلاص ؟؟ …

مش قادر بجد أسكت لأنى قربت أنفجر من الغضب . لأنى اتخدعت فى اشخاص كنت فاكرهم جواهم قدر من الخوف على البلد وأن دورهم المجتمعى كنت متخيل أنه فعال وايجابى لكن للأسف طلع كله بتاع مصلحته .. لو فاكرها مركب وحتنط منها وقت الأزمة ما حتشتد يبقى نط من دلوقتى وسيب الناس المحترمة تكمل لبر الامان .. بلاش طريقة فئران المراكب دى تفضل تاكل لحد ما بطنها تتملى وأول ما المركب تتهز بس ويحس بالخطر ينط الفار السمين منها ويطلع ع الشط يريح ويستنى مركب تانية مليانة خير عشان يتحشر جواها يملي بطنه من جديد ..

أرحموا مصر .. حسبي الله ونعم الوكيل فى كل من يتهاون لحظة فى حق هذا الوطن ..

وربنا كبير على كل تجار العقول .. معدومى الضمير

بيكم أو من غيركم مصر باقية عظيمة بشعبها اللى حيقدر يقف ضد الخطر حتى لو مش ح ناكل ولا نشرب وحتى لو حيحصل أى حاجة والله نفديكى بعمرنا وأرواحنا يابلادى