لو تقدر تمسك دموعك .. حكاية اللص الشريف في كارفور .. تفاصيل دامية

الوطن المصري – جيهان جابر

عندما يعجز الإنسان عن تلبية احتياجاته واحتياجات بيته وأولاده فالموت أهون عليه من شعوره بالعجز أمام أولاده .

حكاية رجل أدمت القلوب واقشعرت لها الأبدان حتي رجال الأمن لم يتمالكوا أنفسهم وأجشهوا في بكاء هيستيري .. تعالوا معنا لنتعرف علي تفاصيل هذه المأساة

حدث فى كارفور ..

قال رجل  : إمبارح كنت بشتري حاجات للبيت وبعد ما خلصت ورايح أحاسب ع الكاشير كان في راجل تقريباً ٥٥ سنه بيحاسب قبلي ع كيس عيش بس أيوه كيس عيش بس .. بعد ما حاسب رجال الأمن اتلمو عليه واخذوه معاهم فأنا شدني الموقف وسألت عليه  .. قالولي ده سارق حاجه والكاميرات صورته ..

فضولي زاد ورحت وراهم وبعد تفتيش الراجل وجدو معاه علبه جبنة صغيرة وتمنها ٣جنيه وبعد تفتيشه ممعهوش غير البطاقة والعيش اللي اشتراه  وعلبه الجبنة .. والراجل منهار وبيبكي ..

وطبعاً أمن كارفور ماسكينه وكأنه سارق دهب وعايزين يطلبوا الشرطه .. ومع محاولاتي اني أدفع الفلوس والراجل يمشي رفضوا وقالوا لازم الشرطة ..  وفعلا الشرطه جت .. ضابط صغير وأمين شرطه ..ولما عرفوا الموضوع سألوا الراجل ليه عملت كده ؟! قالهم كنت جعان أوى وسرقت أرخص حاجه عشان أكل !!

لاقيت ضابط الشرطه بيقول لموظفي الأمن سيبوه يمشي .. طبعاً رفضوا .. لاقيت الضابط اتعصب وقال هنكتب فى المحضر أنكم احتجزتوه بالقوه .. ومع اصرار الطرفين .. وتعاطف كل العملاء .. قرر الضابط انه يمشي الراجل وكمان أعطاه فلوس .. و كل واحد كان واقف دفع للراجل اللي فيه النصيب ..وكل واحد واقف أعطاه من الطعام الذى اشتراه .. شنطة كبيرة اتملت  بالطعام على اختلافه ..

ويفاجأ الجميع ان الراجل مشى قدام وساب الشنطه والفلوس كامله والطعام الذى أهداه له الناس !!

مخدش اي حاجه حتي العيش اللي اشتراه بفلوسه والجبنه اللي كان سرقها !! وكأنه فضل يموت من الجوع ولا يتذل اكتر من كده ..

والله والله انا شفت دموع الناس بما فيهم الضابط والأمن بتاع كارفور .

يا رب ماتذلش حد عشان لقمة ياكلها .. وربنا يديم المودة بينا والمروءة والجدعنه ولا يجب مطلقا أن نغفل موقف ضابط الشرطة الإنسان الذي يمثل وبحق نموذجا لرجل الأمن الذي نحتاج إليه .