بوابة الوطن المصرى أجرأ موقع عربى
الوطن المصري – عبير فوده
حل الثنائي الفنانة غادة عادل وطليقها المخرج مجدي الهواري ، ضيفا على برنامج “بصراحة مع” عبر قناة MBC.
تحدثت غادة عادل عن مشاعرها أثناء فترة زواجهما، قائلة: “الطلاق أفادنا وأفاد أولادنا وبقت بينا علاقة احترام متبادل.. إنت كنت طول الوقت شايف إن إنت الأب لينا، وأنا مش عارفة أتعامل مع الولاد”.
وأجاب مجدي الهواري على سؤال غادة عادل: “متجوزتش ليه بعد طلاقنا؟”، ليرد قائلًا: “في شروط عندي في الجوازة التانية، هل الزوجة التانية هتبقى متقبلة فكرة إني أنا لسه بحبك لأنك أم ولادي وبنتي، الحب اللي ما بينا يا غادة لم يمت حتى الآن.. وانتي لو اتجوزتي تاني أنتي حرة”.
وأضافت: “مكنتش عارفة أبقى مستريحة وسعيدة عشان أوصل لهم ده، مش بسببك لكن بسبب إني كنت مكبوتة.. أنا كنت مش عارفة أعبر عن اللي جوايا وأقول نفسي أعمل إيه، والولاد كانوا بيشوفونا بنتخانق كتير جدا. وكنت في فترة بتختفي وتغيب وأنا أدور عليك، وكان في وقت كنت مش قادرة أتقبل الحياة دي. كنت واخدني شيء مسلم بيه، وبتعاملني كإني بنتك”.
ورد مجدي الهواري قائلا: “أنا حسيت إن لما جيتي مصر كنتي مش فاهمة الحياة، فخدت على عاتقي أفهمك كل حاجة والصح من الغلط، يمكن كان كتير لكن عذري الوحيد إني كنت خايف عليكي”.
ووجهت غادة عادل سؤالا لمجدي الهواري قائلة: “انت شايف أني ماشية غلط في شغلي؟، وأجاب طليقها: “افلامك الفترة الأخيرة بتهزمي نفسك فيها وتاريخ عملناه سوا أحنا أستثمرنا فيها”.
لتنفعل غادة عادل قائلة: “إحنا فيه أفلام عملناها سوا أما بشوفها على التليفزيون ببقى عاوز أقفله عشان محدش يشوفني ومش هقدر أقول أسمائها عشان زمايلي”.
وقال مجدي الهواري لغادة عادل: “الناس كلها فاكرة إن أنا اللي اكتشفتك لكن الحقيقة انتي اللي اكتشفتيني فعندما كنت منتج والناس شايفين انك مش بتعرفي تمثلي وأنا كنت بقول لا أنا كنت مؤمن بيها فأكتشف نفسي أن عندك الموهبة قبل أن أكون مخرج”.
وذكر: “في البداية كان يتم تكريمك كانوا يقولون مجدي الهواري يفرض زوجته على الفن ولكن مع حصولك على الجوائز أصبحوا يقولون غادة عادل وزوجها المنتج وظهرت موهبتنا عندما عملنا سويا في فيلم (الوتر)”.
وأضافت غادة عادل لمجدي الهواري: “أنت كنت مؤمن بيا وتدفعني أكون ممثلة ولكن كان لديك مشكلة أنك تحدد الأعمال حسب ارتياحك النفسي بسبب حبك وغيرتك عليا ومكنتش عارفة أطلع ما بداخلي”.
وقال مجدي الهواري خلال اللقاء، إن زواجه من غادة عادل جاء في سن صغير، واستمرار زواجهما لمدة 20 عامًا، هذا في حد ذاته نجاحًا كبيرًا في حياتهما، قائلًا: لما نقعد متجوزين 20 سنة ده نجاح.
