أمك هتغضب عليك

أمك هتغضب عليك

بقلم – خالدعبدالحميد

تخوض مصر هذه الأيام آخر استحقاق في خارطة طريق المستقبل وهي انتخابات مجلس النواب .. من فضلكم اختاروا صح المرادي .. كل واحد في منطقته عارف كويس جدا مين المرشح اللي يستاهل يمثله في مجلس النواب .

 اللي هيوزع عليك فلوس خدها  منه بس اوعه تديلوا صوتك لان ربنا هيحاسبك وامك هتزعل منك .. عارف مين أمك ( مصر ) يا حبيبي .

واللي يقولك اختار اللي هيطبقوا الشريعة واللي بيخافوا من ربنا اوعه تصدقهم .. الاخوان زمان لعبوا نفس اللعبة وبنفس الطريقة وطلعوا ميعرفوش ربنا وتاجروا بدين ربنا .. ودين ربنا لو اديتلوهم صوتك لأشتكيك لربنا .

ولو لقيت واحد من الفاسدين اللي ودوا البلد في ستين داهية ونهبوها أيام عز بيه والشاذلي وزكريا بيه عزمي ، وفتحي بيه سرور بتاع سيد قراره .. لو لقيتهم نازلين الانتخابات ” تف في وشهم ” لأنهم معندهمش دم  .. أوعه تقولي ده ابن عمي أو من العيلة ولازم اديلو صوتي .. مصر أهم من ابن عمك الفاسد أو قريبك الحرامي اللي نهب البلد .. بلدك أهم يا حبيبي .

كل مرة نقولك صوتك امانة .. والمرادي بنقولك أوعه يكون صوتك سبب في سقوط مصر مرة أخري .

أوعه تصدق أو تآمن لتاجر دين .. أوعه تصدق أو تآمن لحرامية العهد القديم .. واختار بعد كده اللي انت عايزه .. بس لازم تختار صح .

استحلفك بالله اختار صح وراعي ربنا في اختيارك .. صوتك ممكن يسقط بلد .. وممكن يعدي بينا لبر الأمان .. خلي مصر قدامك .. وأدي ظهرك للباقي .. بلدنا غالية علينا وهنبنيها بادينا ..  

لو عجبتكم شيروها لكل الدنيا .. مصر تستاهل مننا كتير .. تحيا مصر

اترك رد

%d مدونون معجبون بهذه: